Este 2023 é um ano especial para a Sociedade Cultural e Deportiva (SCD) do Condado, pois fam-se 50 anos desde a sua fundaçom, no ano 1973. Perante a relevância desta data e tendo em conta o valor do trabalho desenvolvido ao longo destas cinco décadas de ativismo decidimos realizar um trabalho de investigaçom e documentaçom para plasmar num livro conmemorativo os aspectos mais destacáveis da trajetória deste coletivo, assim como refletir a sua incidência na comarca do Condado e arredores, onde a irrupçom da SCD marcou um antes e um depois no acceso popular à cultura galega e universal, assim como na dotaçom de ferramentas para a difussom de novos valores e a participaçom popular.
Trata-se dum trabalho com o que procuramos recuperar a nossa memória histórica mais recente, essa que começou quando um grupo de moços e moças inconformistas juntarom-se para construir de seu espaços de convívio e autoorganizaçom, com a lingua galega como ferramenta comunicativa em pleno franquismo, cumha oferta cultural original e novidosa, que sacava à luz diversas manifestaçons criativas que tinham sido silenciadas, quando nom perseguidas.
Foi tal a força inicial da SCD que nom demorou em superar as duascentas pessoas associadas, tendo sida reconhecida polos meios de comunicaçom da época como a segunda da Galiza em base ao número de atos desenvolvidos no ano 1975. O Condado convertia-se em vanguarda cultural do país graças, em boa medida, ao trabalho ativista e popular protagonizado pola entidade que pretendemos reconhecer e homenagear com a ediçom deste livro.